Монгол Улсын Хөдөлмөрийн баатар, Монгол Улсын Ардын жүжигчин, Соёлын гавьяат зүтгэлтэн, ОХУ-ын Буриад улсын урлагийн гавьяат зүтгэлтэн, СУИС-ийн Хүндэт профессор Д.Ухнаа таалал төгсчээ. Тэрээр Улсын хөгжимт драмын театрын дуучнаас ажлын гараагаа эхэлж, соёл, урлагийн хөгжлийн төлөө тасралтгүй 60 гаруй жил хөдөлмөрлөхдөө Монголын болон дэлхийн сонгодог олон арван дуурьт гол дүр бүтээж, Улсын Филармонийн симфони найрал хөгжмийн 200 гаруй тоглолт,
Соёл-Эрдэнэ хамтлаг, Баян Монгол чуулгын 400 гаруй тоглолтыг удирдан зохион байгуулж, 4,500 гаруй концерт хөтөлж, 220 гаруй концерт найруулан үзэгч түмний хүртээл болгосон, дэлхийн 70 гаруй улсад Монголын урлагийн 400 гаруй удаагийн тоглолт зохион байгуулан үндэсний болон эстрад урлагийг сурталчлан таниулж, соёл, урлагийн салбарыг хөгжүүлэх их үйлсэд үнэтэй хувь нэмэр оруулсан эрхэм билээ.
Урлаг, соёлынхон гүн эмгэнэл илэрхийлж байна.
Дуучин С.Гантогоо:
Их урлагт нэгэн насаараа зүтгэсэн эрхэм хүмүүн Монгол Улсын Хөдөлмөрийн баатар, Ардын жүжигчин, Соёлын Гавьяат зүтгэлтэн, Оросын Холбооны Буриад Улсын Урлагийн Гавьяат зүтгэлтэн Д. Ухнаа гуай хорвоогийн мөнх бусыг үзүүлжээ. Монголын эстрад, рок поп урлагийг хөгжүүлэхэд үнэтэй хувь нэмэр оруулж хоёргүй сэтгэлээр зүтгэсэн энэ эрхэм хүмүүнээс Б.Баяраа /агсан/, Б.Сарантуяа, Х.Төмөрбаатар /УГЖ/, Ч.Насантогтох /УГЖ/, Л.Оюунчимэг /агсан/, Д.Эрдэнэтуяа зэрэг нэрт дуучид төрсөн гэхээр үнэхээр гайхамшигтай. Гэр бүл, төрөл төрөгсөд, найз нөхөд, хамтран ажиллагсад нь ГҮН ЭМГЭНЭЛ ИЛЭРХИЙЛЬЕ.
Дуучин Насаа:
Хайрт багш минь та минь амгалан нойрсох болтугай. Та минь үнэхээрийн суралцмаар хувийн зохион байгуулалттай, сэтгэлтэй, зүтгэлтэй, чамбай, тайзны өндөр соёлтой, биеэ үнэхээрийн сайхан авч явдаг урлагийн тод гэрэлтэх од байсан шүү. Гэр бүлд нь гүнээ эмгэнэл илэрхийлье.
Ар гэр төрөл төрөгсдөд нь гүн эмгэнэл илэрхийлэе.
